جريدة الحقيقة الإلكترونية
ورداً على هذا الهجوم كتب “زوربا” منشوراً على حسابه الرسميّ بموقع “فيسبوك” يوضح فيه حقيقة الصورة، حيث قال:”امبارح نزلت صورة سيلفي مع السفيرة الامريكية ، وشفت انو في ناس كفروني ، وطلعوني عن الدين ، وعملوني عميل ، وهانت عليي القضيه ، وانا بايع حالي ، وخاين ، و عميل مزدوج ، ومدسوس ، وعندي اجندة ، وداخل بمؤامرات ، ومعي جنسية امريكية واسرائيليه ، وانا عندي مخططات ، و اشتروني الامريكان ، وخنت الامانه ، والبلد ، والشعب ، والامة ، وفي ناس هدرو دمي ، وهددوني ، وسوف نقضي عليك وعلى امثالك العملاء .. الخ”.
وأضاف:” وانا صراحه مش عارف اشي ، وفي ناس حطوني مع السياسيين ، والمعارضين ، وحزب الابصر شو !! .. انا مش سياسي ، وما بكتب بالسياسه ، وما عمري حكيت ب اشي سياسي والله ، انا من اسبوع عرفت انو اميركا بالأردن فيها سفيره مش سفير!!”.
وتابع:” انا بني ادم طبيعي ، وتصورت صورة طبيعية مع سفيره ، وبالزمانات قدمت عالسفاره مرتين مشان اسافر ع اميركا واشتغل و اجلي صحون بعدين اتجوز امريكية كبيره ويصير معي جنسيه ومصاري وارجع واشتري بيت وهيك ، هيك كانت الاسطوره زمان ، وكانو يحكولنا انو ساعة الشغل ب ميت دولار!!
وقال: “بس الناس اللي كانت اصلا بتستناني ع غلطه ، مسكو الصوره وتفننو فيها ، وما توقعناك هيك ، وما بنعرفك هيك ، شو يعني هيك؟ يعني اذا كنت بمكان انا والسفيره وتصورنا شو اعمل؟! اطخها؟! ولا اهرب منها ؟! انا تصورت الصورة وابدا مش ببالي اشي والله ، لا اجندات ولا اني صهيوني ولا انبعت ولا اخدت مصاري ، كانو الكل طبيعيين و عادي ، والله ما عزمتها ، ولا زغرتللها ، ولا اعطيتها ورقة طلبات ، ولا هديتها برداية لمطبخها ، الموضوع كان عادي جدًا ،،”.
وأردف: “انا مش سياسي ابدا ، وما بعرف اشي بالسياسة والتاريخ ، وما كنت اعرف انو السفيره هي اللي كانت سبب دمار الامة ، وما كنت اعرف انو صورتي معها رح اصير عميل ، ولا اخدت ٣ مليون!!”.
وأوضح زوربا: “اللي بعرفني ومتابعني بعرف اني مليش عهالقصص ابدا ، ولا بعرف فيها ، ولا بتدخل فيها ، انا بني ادم طبيعي زيي زي اي حدا ، عندي بروفايلي وبكتب فيه ، واللي شايفني غلط وانا مش من مستواه العلمي والوطني والثقافي ، بقدر ما يتابعني ابدا ، وما يوجع راسو فيي ، انا ما انحبست مشان سياسه ، ولا اجو اعتقلوني من البيت ، انا جدا عادي ، وهيني باكل شوربة عدس ، وقبل الصورة كنت اكل شوربة عدس ، واموري تمام ، وبعدني بدور ع سيارة اقساط ،،”.
وقال الكوميدي الاردني: “انا نزلت الصورة ومسحتها امبارح مشان الاحداث المؤسفه اللي صارت ب اربد ، لانو الدعوه اللي نزلتها لاهل اربد اهم مني ، ومن صورتي ، ومن كل اللي صار ، وشفت انو توقيتها غلط ! .. واللي خاب ظنو فيي بحب اقولو حقك عليي ، بس انا ما عملت اشي ليخيب ظنك ، انا ما سرقت ولا كفرت ولا قتلت ، ولا انا فاسد او حرامي”.
ويحظى الفنان الكوميدي عمر زوربا بمتابعة واسعة على مواقع التواصل الاجتماعي، نظراً لاسلوبه المبسّط والفكاهي في نقد تصرفات بالمجتمع الاردنيّ.
