(س) تنحل مشكلة الاسكان !

ابشروا بالخير يااهل الديوانية قالها المعاق وهو فرحان اخر انبساط وهو يردد هذي الاخبار الطيبة .. ثم اضاف تقول الاخبار ان فيه مقترح بصفة الاستعجال لتعين مستشار عالمي راح يساهم في حل للمشكلة الاسكانية .. ويقولون القضية الاسكانية لا تتحمل المزيد من الدعايات .

الشايب : الله يبشرك بالخير وهذا عشمنا بحكومتنا الله يعزهم ولا يعز عليهم .

الرجل : عشم ابليس بالجنة احلق نص شاربي ان انحلت هالمشكلة المفتعلة !.

الشاب : ياجماعة الخير هالكلام ماخوذ خيره وهالخبير وش راح يضيف لنا .. حاله حال الخبراء الكثيرين اللي جابتهم الحكومة لاغلب مشاريعها لان الرجال راح يخطط ويضع برامج ويكرمونه بحفل شاي  واخرتها الجماعة يقفلون عليها بالدرج الايسر للمكتب .. واه ياخوفي من الخبير المنتظر لا يطلع مثل فؤاد خبير درب الزلق اللي اخرته كانت خراز نعول (اعزكم الله) .

الخبير : ايييه ياجماعة خفو علينا شوية انتم ناسيين ان صوابع الايد مش زي بعض .. وان مش كل خبير خبير ده للعلم والمفهومية ورجاء بلاش الغلط .

الشايب : تكرم ياخبيرنا انت غير وياليت كل الخبراء مثلك .. تري حنا نتكلم عن البعض وثق ثقه عمياء ان حنا ما راح نجمع الكل .

الرجل : المشكلة واضحه وضوح الشمس ماهي محتاجه خبراء وتفلسف زايد .. كل ما بالامر هو توفير اراضي وسيولة مادية والمشكلة تنحل خلال سنوات قليلة .. بس لي رجاء خاص ان الشركات العالمية تدخل بالمشاريع الاسكانية بعيد عن شركاتنا المادية الربحية على حساب المواطنين .. لان اغلب المشاريع الاخيرة (انلهط) بعض مواصفاتها الجيدة ورقعوها بما رخص ثمنه .

الشاب : كلامك طيب وسالفة الخبير ترها مضيعة للوقت .. والله حاله راح يطلبون خبير علشان يقول لنا اشلون نجهز ونبني بيوت للكويتيين .. السالفة ومافيها جرت قلم وينتهي كل شي لان والله عيب علينا نجيب خبراء نتفشل جدامهم لمشكلة اسهل من السهالة .

الشايب : اييه والله كلامكم عدل اذكر علي زمانا بنوا بيوت الشعبيات لنا بدل من العشيش علشان يسكنونا فيها تكون بديلة حتي تخلص بيوتنا الحالية وانتظارنا بالبيوت الشعبية ماطول كلها خمس سنين وتركناها لغيرنا اللي اخذ نفس مدتنا بالانتظار وانتقل الي بيت عمره يعني الامور سهالات بس كلها ترجع للمسئولين ان اشتهوا .

المتمولس : هم ليش ما سألوني الحل عندي !.. وهو اسهل من سلق البيض نبني عشيش مثل ايام قبل وخلاص .. وليش ندوخ انفسنا الخبير نام الخبير قام الخبير يبي يرتاح نفسيا الخبير يبي كرت فيزا يجيب مرته وعياله .. ههههه اه يابطني قال مستشار عالمي لحل أزمة الاسكان  ! .. وفي هذي الاثناء رفع على مسامعنا الشيخ زغلول اذان الظهر .